Pasko Na Naman: An Easter Message

Pasko na naman sa Pilipinas dahil Pasko ng Pagkabuhay ng ating Panginoong Jesus. Marami sa atin ang nakapaghanda nang dumagsa sa mga malls at pasyalan dahil maraming mga gimmick ang iba’t-ibang establishments sa araw na ito. Wala namang masama kung ialabas nating paminsan-minsan ang ating pamilya mas makabubuti pa nga sa ating ‘yon upang mapagyaman pa natin ang ating relasyon sa bawat isa.

Idagdag natin sa ating kasiyahan ang malalim na kadahilanan ng araw na ito. Ito ay ang muling pagkabuhay ng ating Panginoong Jesus mula sa kamatayan. Namatay siya upang iligtas tayo sa ating mga kasalanan--ang tanging dahilan kung bakit nalalayo ang tao sa Diyos. Nabuhay siya upang pagkalooban tayo ng buhay na pag-asa.

Isaisip lang natin ng saglit...Ang unang pasko ay nagpakita sa atin ng pagmamahal ng Ama sa ating lahat sa pamamagitan ng pagpapadala sa kanyang bugtong na anak para sa atin. Sa ikalawang pasko ang kanyang sakripisyo sa krus ang nakapagpalinis sa ating mga kasalanan. Sa ikatlong pasko siya ay babalik muli upang sunduin ang lahat ng mga nagbigay tiwala at buhay sa kanya. Pasko ng pagkapanganak, pagkabuhay at muli niyang pagdating. Lahat ay nagbabadya sa ating mag-isip ng malalim, manalangin ng mataimtim at magsaya ng lubusan.

Damhin natin ang lubusang kabutihan ng Diyos sa ating lahat. Ipagkaloob natin ang ating mga buhay sa kanya ng walang limitasyon. Manatili sa kanyang kabutihan at kabanalan. Igalang at isabuhay ang lahat ng kanyang mga sinasabi sa kanyang Salita. Magmahal sa ating mga kapwa tulad ng kanyang pag-ibig. Siguraduhing malalim ang kadahilanan ng iyong ligaya sapagkat kapag dumating ang panahon ng pagsubok malalim din ang balon na paghuhugutan mo ng kalakasan. PASKO NA NAMAN!